OverStortinget

Som i innlegget mitt, meiner eg at konsekvensane av å vedta forslaget som ligg til behandling i dag, ville ha vore dramatiske. Me står i ein situasjon der me må sikre betre både styring og kostnadskontroll i sektoren. Me jobbar intenst med å få på plass fleire langsiktige rammeavtaler. Som eg har svara mange gonger i Stortinget sidan eg blei barne- og familieminister, ynskjer me både å styrkje den statlege grunnkapasiteten – det har me gjort, det må me fortsetje med – og eit betydeleg innslag av ideelle aktørar, men me må òg ha med dei kommersielle. Det er òg styringssignala Bufdir har fått, og det meiner eg er nødvendig for å løyse dei største problema. No har me heldigvis sett ei veldig positiv utvikling når det gjeld brot på bistandsplikten. Det var særleg krevjande i 2023 og 2024. No ser me stor forbetring. La meg likevel understreke at dei ideelle har ei historisk viktig rolle i barnevernet, og det skal dei framleis ha òg med Arbeidarpartiet i regjering.