Noreg har aldri redusert klimagassutsleppa sine så mykje som ein har gjort dei siste fire åra. Samtidig har næringane våre omstilt seg, arbeidsplassar blir ivaretekne, og ein byggjer nye. Denne regjeringa viser at ei ansvarleg omstilling som sikrar konkurransedyktig industri, er mogleg. I 1948 produserte aluminiumsverket i Årdal aluminium for første gang. Hydro Aluminium er den viktigaste drivkrafta for at lokalsamfunnet og industrien i Årdal fortset. Dei tilset lærlingar, unge i sommarjobb, nyutdanna og erfarne, samtidig som ein opprettheld industriproduksjonen her i Noreg. Hydro har gått i bresjen for omstilling og motteke 46 mill. kr frå Enova. Resultatet er at Hydro er på veg til å lage netto null-aluminium innan 2050, og aluminiumsindustrien er ei av dei mest omstilte næringane vi har i Noreg. Ikkje berre skapar dette føreseielege vilkår for at Hydro skal fortsetje å drive i lang tid, skape arbeidsplassar i Noreg og ivareta små kommunar, men det aukar konkurransedyktigheita på ein marknad der berekraft har blitt eit av dei viktigaste krava. Det er ansvarleg omstilling. Framstegspartiet derimot føreslår kutt i Enova, nedskalering av Innovasjon Noreg og avvikling av klima- og energifondet på til saman 9,6 mrd. kr. Desse støtteordningane har ikkje berre sikra Hydro Årdal ei framtid, tryggleik for dei små kommunane våre og lokalsamfunna, men det sikrar industrien her i Noreg og at industrien blir. For meg framstår Framstegspartiet som eit meir og meir næringsfiendtleg parti utan evne til å ta vare på verdiskapinga i Noreg.

Tidlegare i år sa Høgre at noregspris fører til høgare straumforbruk, høgare straumpris og dyrare nettleige. Samtidig gjekk representanten Stokkebø ut i Stavanger Aftenblad og kalla noregspris for noregsbløffen. Høgre har føreslått alternativet sitt tryggpris, som knapt nok nokon forstår, heller ikkje i Høgre. No ser vi dei første resultata av noregspris. Innbyggjarane i Sør-Noreg har spart 1,6 mrd. kr etter å ha teikna noregspris. Høgre har vore relativt stille dei siste vekene, og dei har heller ikkje føreslått å avvikle noregspris i det alternative budsjettet sitt. Mitt spørsmål til representanten er dermed: Står han framleis inne for at ordninga som har spart heilt vanlege folk for 1,6 mrd. kr, kan kallast ein bløff?

Klimaendringane fortset å ramme verda og Noreg, våre kystar og våre lokalsamfunn. Været har blitt meir ekstremt, og vi har aldri hatt så mange varme dagar i eit av verdas nordlegaste land. Altfor mange har mista liv og hus i flaum og ras. Dette påverkar vår kvardag. Det er desse klimaendringane som stengde 50 vegar samtidig på Vestlandet i mars, og som gjorde at fleire tusen innbyggjarar blei isolerte og evakuerte i Sogn og Fjordane. Det er desse ekstremvêra som har teke hus og liv i ras langs heile Noreg. Vi har ikkje råd til ikkje å prioritere klima. Det er viktigare enn nokosinne med eit budsjett som tek ansvar, som løyver 1 mrd. kr ekstra til rassikring når ekstremvêret berre blir verre, så vegane våre blir tryggare når dagane med styrtregn aukar, og som sikrar at ein skal kunne bu både inst i Sognefjorden og ytst på kysten utan å måtte vurdere om det er trygt å køyre til jobb i dag. Samtidig som budsjettet tek ansvar for at Noreg skal vere trygt, går òg utsleppa ned. Klimapolitikken til regjeringa har funka, og dette budsjettet tek klima på like stort alvor. Vi viser at ein kan prioritere å utvikle industrien så arbeidsplassane er trygga, samtidig som kollektivtrafikken blir billigare, og å velje klimavennleg i kvardagen blir enklare. Vi er avhengige av ein klimapolitikk som tek ansvar for utslepp, ikkje berre her heime i Noreg, men òg internasjonalt. Dette budsjettet er tydeleg: Det er fullt mogleg å prioritere arbeidsplassane langs kysten og bussane og vegane våre samtidig som ein tek ansvar og går i bresjen for å få ned utsleppa. Difor er eg glad for at Arbeidarpartiet og det raud-grøne samarbeidet leverer eit trygt og ansvarleg budsjett for heile Noreg og tek ansvar for at alle skal leve eit trygt liv.